寫給在我肚中的執仔仔：
執仔仔，媽媽好想同你講「多謝你」同「對唔住」
多謝你選擇左我同執爸做你既父母，仲有個好可愛既執仔做你既哥哥，你咁快就選擇跟住哥哥黎到我地屋企，我感覺到你係聽到媽咪係年幾前既祈禱「邊位小天使想黎做我地既仔女呀？爸爸媽媽一定會好錫好錫你地」！又可能你同哥哥係天堂等緊做bb既時候已經係好朋友，所以約定左咁快就緊隨住哥哥黎到我地屋企，好快你地又可以一齊玩喇🥰🥰🥰又好可能，一切只係我諗得太美好，你地兩個會玩到我晚晚冇得訓😂😂不過點都好，爸爸媽媽真係好期待你既蒞臨，令到我地家庭十分之完整圓滿👨👩👦👦❤️❤️
另外媽媽想同你講既係「對唔住」，對唔住係一個咁動蕩既日子帶你黎到呢個香港，
對唔住我未有能力帶你離開呢個地方，
對唔住係懷孕期間成日比你睇到當權者暴力對待市民既畫面，
對唔住媽咪成日唔開心，我相信你都一定感受到，而我控制唔到，唔開心到個人好冇朝氣、對好多事情都提唔起勁。。。
香港係一個我好愛既地方，由細到大都對身為「香港人」而覺得驕傲，係呢度讀書、長大、做自己鐘意既工作、結婚、成家立室，即使城市一早已經慢慢被蠶食、被當權者出賣，呢到都係我既家，係我想落地生根既地方。。。
但係而家一切都變喇，香港變得好唔安全、變得人心惶惶、變得撕裂，即使一家人都會因為政見不同而心生仇恨、認識幾十年的朋友會因為是非不分而變成陌路人，香港已經變得家不成家，現在只靠一班年輕人擔當起保家衛國的責任，但點解要我地既下一代承擔唔屬於佢地既責任？點解本應負責任果班人要顛倒是非、蛇鼠一鍋，任由一群「唯一受權執法者」肆意傷害無辜平民百姓？
執仔仔，你同哥哥同所有小朋友都一樣，應該無憂無慮快樂健康成長，唔應該咁細個就要擔心社會動蕩、擔心無原因被打，甚至據理力爭都會隨時失去性命。。。邊個可以還返開心快樂童年比香港既小朋友？
對唔住。。真係好對唔住。。
不過媽媽可以百分之百應承你，當初祈禱既承諾不變，爸爸媽媽一定會好錫你地、用最大既努力將最好既事物提供比你地、教你地明辨是非、教你地相親相愛、即使有日你地要企上街頭做勇武，媽媽都會企你地前面幫你地開路擋子彈。。。
雖然呢刻無力感好重，但為左你地兩兄弟，媽媽會變得強大，令你地可以無憂無慮成長，而第一樣野我要做既，係變返樂觀，唔駛你係肚入面成日都感受到壓力，希望你係一個愛笑既樂觀小孩，有能力笑著面對一切不如意事情，雖然要你出生係最壞既時代，但而家同時係香港人最清醒既時代，我相信你地會有美好既未來，期待有一日媽媽帶你地去煲底同各位哥哥姐姐講聲多謝
愛你的媽媽上
寫於又一晚訓唔著既晚上
Search